Вторник
21.11.2017
22:24
Block title
Поиск
Статистика

Онлайн всего: 1
Гостей: 1
Пользователей: 0
Форма входа
Новые файлы
[03.11.2017][Библиотека.]
В. И. Шкуро. Участие горцев-добровольцев Кубанской области в русско-турецкой войне 1877–1878гг. (0)
[24.08.2017][Архивные документы.]
Приговор жителей селения Понежукайского об опеке над имуществом сирот Тлехурай. (0)
[24.08.2017][Архивные документы.]
Рапорт о жительницах аула Эмукай Хацац и Куцац. (0)
Новое в форуме
  • Некоторые исторические факты. (5)
  • Участники Белого движения из Ассоколая. (0)
  • Жертвы политических репрессий. (2)
  • Новые статьи
    [10.05.2017][Статьи на русском.]
    Есть чем гордиться. (0)
    [11.10.2016][Статьи на русском.]
    Хаджибеч и Лелюх Анчоки (0)
    [23.09.2016][Статьи на русском.]
    Ему дано «приходить, видеть, побеждать»! (0)
    Аскъэлай
    Аскъэлай

    Аскъэлай (аул Ассоколай)

    Главная » 2016 » Май » 10 » Къоджэдэсхэр нэфынэ щигъакIэхэрэп.
    11:34
    Къоджэдэсхэр нэфынэ щигъакIэхэрэп.

    Зигугъу къэтшIыщтыр Теуцожь районымкIэ Пэнэжьыкъое сетевой участкэм ипащэу Гъу­кIэлI Якъуб. А Iоф­шIапIэм илэжьакIохэр ары районым ипсэ­упIэ­хэм, ихъызмэт­шIа­пIэхэм, организациехэм, учреждениехэм  зэпыу имыIэу электроэнергиер къязытырэр.

    P1020651Якъубэ 1958-рэ илъэсым Ас­къэлае къыщыхъугъ. Дзэ къулы­къум къызекIыжьым, Рязань дэт радиотехническэ институтым щеджэнэу чIэхьагъ, ау ащ ичIыопс ипсауныгъэкIэ къемы­кIоу къычIэкIыжьыгъ. Ащ ыуж Ростов-на-Дону дэт радиотехническэ училищым щеджагъ.

    Ар къызеухым, IофшIэныр Мыекъуапэ дэтыгъэ межхо­зяйственнэ мэзхъызмэтшIапIэм диспетчерэу щыригъэжьагъ. 1984-рэ илъэсым Пэнэжьыкъое «Сельхозтехникэм» иинженер-механикэу агъэнэфагъ. Шэнды­къо дэт чэтэхъо фабрикэм, нэ­мыкIхэм ащылэжьагъ. Iоф ышIэ­зэ, Пшызэ мэкъумэщ институ­тым электрофикациемкIэ ифакультет 1994-рэ илъэсым къыухыгъ.

    — А илъэс дэдэм Пэнэжьы­къуае дэтыгъэ район электро­сетым Iоф щысшIэнэу сыкъа­гъэкIогъагъ, — игукъэкIыжьхэм тащегъэгъуазэ ГъукIэлIым. — Ипэщагъэр ГутIэ Шумаф. Сэ мастерэу, къутырэу Шевчен­кэмкIэ сыгъэзагъэу саштэ­гъагъ. ПэнэжьыкъуаекIэ мастеры­гъэр ХъокIо Олыгъэй. 2000-рэ илъэ­сым ахэр зэхатэкъожьыгъагъ. Джы Пэнэжьыкъуае дэт сете­вой участкэм ипащэу сызылажьэрэр илъэс 11, электрикмэ сызахэтыр илъэс 22-рэ хъугъэ.

    — Нахьыпэм тышъхьафыгъэ­мэ, джы Теуцожь район электросетьхэм яIофшIапIэу Адыгэ­къалэ къыщызэIуахыгъэм тепхыгъ, — къытфеIуатэ тигущыIэ­гъу. — Типащэр Хъурэе Адам. Сэ сызипэщэ коллективыр нэбгыри 10-м ехъу­щты­гъэмэ, джы нахь макIэ ашIызэ къагъэнэжьыгъэр блы. Зи­пшъэрылъхэр зымыгъэ­цакIэрэ, исэнэхьат хэшIыкI фызи­мы­Iэ, зищытхъу умыIуапхъэ тиIэп.

    Апэ зыцIэ къыриIорэр ежь игуадзэу, мастерэу ХьэкIэко Мухьдин. Опытышхо зиIэ элект­рик. Шъыпкъагъэ хэлъ, зыфэ­гъэзэгъэ IофшIэныр еIолIапIэ имыIэу егъэцакIэ. Аскъэлае щыщ кIалэу ГъукIэлI Рус­лъан электромонтер. 1996-рэ илъэ­сым къыщегъэжьагъэу Iоф ешIэшъ, ищытхъу нэмыкI ари­гъа­Iорэп, зыфагъазэрэр егъэ­цакIэ, къоджэдэсхэр егъэразэх. КIэмгуе Валерэ Пэнэжьы­къуае щыщ, хъупхъэ дэд, сыд фэдэ Iоф фэбгъэзагъэми, укъы­гъэукIытэжьыщтэп. Пэнэшъу До­лэт кIэлакIэ, гъэрекIо Красно­дар дэт къэралыгъо технологи­ческэ университетыр къыухыгъ, электромонтерэу IофшIэныр ри­гъэжьагъ, къыщэтхъух, ущыгу­гъынэу щыт, ыпэкIэ лъыкIотэщт. Пэнэшъу Андзор шофер, сы­ди­гъуи иавтомашинэ хьазыр, чан. Джэндар Асиет электромонтер-эскизировщик, бзылъфыгъэ рэ­хьат, IофшIэнэу зыфэ­гъэзагъэр дэгъоу егъэцакIэ.

    Непэ электроэнер­гиер щыIэныгъэм щыщ шъыпкъэ хъугъэ. Ар щы­мыIэу джы зи пшIэн плъэкIыщтэпСыд фэдиз псэупIа къэжъугъэ­гъунэрэр?

    — Псыхъохэу Псэкъупсэрэ Пщыщэрэ азыфагу къыриубытэрэр ары — Гъобэкъое, Джэ­джэхьэблэ, Аскъэлэе, Пэнэжьыкъое ыкIи Очэпщые чIыпIэ койхэм ахэхьэрэ псэупIэ 20 фэдизыр ары. Адэтых ахэм хъызмэтшIэпIэшхохэу «Синдика-Агро», «Киево-Жураки» зы­фа­Iохэрэр, Пэнэжьыкъое чэтэхъо фабрикэр, фермерхэм яхъыз­мэт­шIапIэхэр. Ахэм ямеханизаторхэм чIыгу гектар мин 23-рэ фэдиз агъэлажьэ. Чылагъо­хэм сымэджэщхэр, ФАП-хэр, еджапIэхэр, нэмыкI IофшIапIэхэр адэтых. Электроэнергие щы­мыIэу зыми Iоф ышIэн ылъэ­кIыщтэп. А зэпстэумэ ар игъом аIэкIэгъэхьэгъэныр ары тэ ти­пшъэрылъыр.

    Адэ а пшъэрылъы­шхор дэгъоу зэшIохы­гъэ­ным фэшI сыд фэдэ элект­ротехническэ ­амала шъуиIэхэр?

    — АхэмкIи тыуIэшыгъ. Анахь шъхьаIэхэм ягугъу къэсшIын. Ма­ры мы унэу тызчIэсыр гуIэ­тыпI, дэгъу, фабэ. Тигаражи ав­томашинитIу чIэт. Трансформаторнэ подстанциехэу 133-рэ къуаджэхэм, къутырхэм адэт. Ахэр «ТП 10/04» зы­фаIохэрэм афэдэх. Электроэнергиеу киловольти 10 зэры­кIорэ гъучIыч километри 180-рэ ыкIи 0,4 ки­ловольт зэрыкIорэ гъучIыч кило­метрэ 200-м ехъу зигугъу къэс­шIыгъэ псэупIэхэм ащызэбгырыщыгъ. Трансформаторнэ подстанции 133-мэ ящыкIэгъэ электроэнергиер аIэкIэзыгъэхьэрэ подстанциехэу «35/10 киловольт» зыфиIохэрэм афэдищэу тиIэхэр адэтых Пэнэжьыкъуае, къутырэу Шевченкэм ыкIи по­селкэу Зарям. Арышъ, Iоф тшIэ­ным фэшI ищыкIагъэр зэкIэ тиI.

    Аущтэу щытмэ, къо­джэдэсхэр зэрэжъугъэразэхэрэм, электроэнер­гиер игъом, зэпыу имы­Iэу зэраIэкIэжъу­гъахьэ­рэм, ащкIэ шъуиIофхэр зэрэзэхашъущэхэрэм ти­гъэзетеджэхэм ятэгъэ­гъашI.

    — Сэри Аскъэлае сыдэсышъ, къоджэдэсхэм сащыщ. Ягумэ­кIи, ягукIайи, ягушIуагъохэми са­щыгъуаз. Ащ пае нэфынэр чэщи мафи яIэным сэри, сиIоф­шIэгъухэми тыпылъ. Типащэу Хъурэе Адами джары игумэкI шъхьаIэр. Адыгэкъалэ диспетчерхэм къулыкъур щахьы, узэ­рафытеощтыри зэкIэми ашIэ.

    Унагъохэм анэмы­кIэу, анахь шъунаIэ зытетырэ хъызмэтшIа­пIэ­хэри, ренэу нэфынэр зыIэкIэхьан фаехэри шъуиIэх.

    — Ары. Чэтэхъо фабрикэр, сымэджэщыр, администрациер. Ахэм ятрансформатор зыгорэ къехъулIагъэми, такъикъ 30 на­хьыбэ темышIэу нэфынэр афыхэдгъэнэжьынэу амалхэр тиIэх. ЕджапIэхэми, кIэлэцIыкIу Iыгъы­пIэхэми генераторхэр яIэх.

    Ащ пыдзагъэу ГъукIэлI Якъу­бэ къытфиIотагъ къоджэдэсхэм яэлектроостыгъэхэр чэщырэ къэ­мыкIуасэхэу, мэзэхэ шIункIым къыхэмынэхэу, нэфынэр ­ренэу яунэхэм арызыным фэшI непэ яIофшIэнхэр зэрэзэхащэхэрэр. 2014-рэ илъэсым мыл ощхыр зыщэIэм, электроэнергиер зэ­рыкIорэ гъучIычэу зэхицунтхъэ­гъагъэхэр шIыхьафкIэ зэпашIэ­жьыгъагъэх. Непэ къызнэсыгъэм ахэр пкъэухэм къяулэлэ­хэу, жьыбгъэм зэтыридзэмэ, све­тыр къэкIуасэу щытыгъ. Мы аужырэ илъэсхэм ахэр агъэцэ­кIэжьых.

    — IэпыIэгъу тафэхъунэу чIы­пIабэмэ тащыIагъ, — тиупчIэ­хэм яджэуапхэр къыритыжьы­зэ къеIуатэ Якъубэ. — Олимпиадэ джэгунхэр Шъачэ щыIэнхэ зэхъум сиIофшIэгъухэу Гъу­кIэлI Руслъан, Пэнэшъу Ан­дзор, Шэуджэн Руслъан сигъу­сэхэу мэзиблэ тыкъэтыгъ. Мэз­хэм, къушъхьэхэм тахэтэу пкъэ­ухэр, гъучIычхэр зэблэтхъугъэх. Крымскэ тхьамыкIэ­гъошхо къызыщэхъуми мэфэ 12 тыкъэтыгъ. Каневской ыкIи Адлер районхэми мыл ощххэр ащыIагъэу сагъакIоу хъугъэ. Рэхьатэу унэм сисэу бэп къызэрэхэкIырэр…

    DSC_0309

    ГъукIэлI Якъубэ унэгъо дахэ иI. Ишъхьэгъусэрэ ежьыррэ лъфыгъищ зэдагъотыгъ.

    Якъубэ щытхъу ыкIи рэзэныгъэ тхылъ 30-м ехъу къыфа­гъэшъошагъ. Анахь зыщыгушIу­кIы­рэр Урысыем и Президентэу В. Путиныр зыкIэтхэжьыгъэ тхылъэу «За значительный вклад в подготовку и проведение XXII Олимпийских зимних игр и XI Паралимпий­ских игр 2014 года в Сочи» зыфиIоу ащ фэшIыкIэ къыдагъэкIыгъэ нэпэеплъ медалэу «Сочи-2014» зытетхагъэр зыкIыгъур ары.

    Нэхэе Рэмэзан.

    Адыгэ макъ.

    Просмотров: 177 | Добавил: Анцокъо | Рейтинг: 0.0/0
    Всего комментариев: 0
    Добавлять комментарии могут только зарегистрированные пользователи.
    [ Регистрация | Вход ]