КЪЫРЫМ ХЪАНЫМРЭ АБДЗАХЭХЭМРЭ

(Я 15-рэ л1эш1эгъум къэхъугъ).

Къырым хъаным инэгъоидзэ

Къэбэртаим ибэр зэлъештэ.

Чылагъоу зэлъиштагъэхэр

Фаш1эк1э зэлъегъэпщынэх.

Щынагъок1э къаригъэш1энэу

 Абдзахэмэ л1ык1ор афеш1ы.

Дахэк1э къызыфемыш1ухэм

Л1ыгъэш1ап1эм ащ зыредзы.

Абдзахэр Хъаным ш1от1асхъэу

Ыштэнэу хъунк1эр къыредзы,

 Дзэпащэу хъаным и1эр

Абдзахэмэ гъэрэу къаш1ы.

Дзэпащэу гъэры аш1ыгъэр

Чъыгышъхьэ хъэринэ къаш1ы.

Щыш1ыгъэм хъаныр егъаштэшъ

Шъхьэегъэзып1эм къылъэхъужьы.

Къырымы дзэр хьэдэ лъэмыджэу

 Курджыпсым зэлъы1уаш1ыхьэ.

 Пчыхъэ псыхъом дэхьэгъадзэм,

Зы1отэжьыни хамыгъэк1ыжь.

Къырым хъаным изэол1ыбэр

 Мы заоми къыш1ухэк1уадэ.

Гук1одыгъом рифыжьэжьыгъэу,

 Фаш1эхэри къыщагъэгъупшэ.

Абдзахэм изэол1ыбэр

Л1ыгъэш1ап1эм к1эмыпсэфык1.

 Къызэплъэк1ызэ Къырым хъаныр

 Шъхьэгуащэ аш1уесык1ыжь.

Зао зэпш1ыл1эщт пстэур

Зэрэзэфэмыдэр ащ къыш1агъэу

Фаш1эхэри имыгугъущэу,

Шъхьагуащэ ар аш1уек1ыжьы.

Абдзахэм иныбжьык1абэмэ

Шыпхъаблэк1э зарагъахьыжьы.

 Як1асэхэу ащ къяжэхэрэмэ

Щыфыбэри зэлъя1эжэгъу.

Кубэ Щэбан