"Гупшыс".
Мы тхылъыр сэтхьаусыхэшъ хэсэхы,
Зэхэзыхырэм ыгу ек1унк1э селъэ1у,
Ярэби, адыгэжъ мыгъок1э сыдэу тымыгъас:
Гъэсэныгъэм тик1алэхэр фэмыл1эу,
Тил1ыжъымэ адыгабзэр тфамыштэу,
Къэмыштэнэу ч1ыгу ц1ык1ум тыщащэ,
Тащыщэу былым зыгъотырэр къытэшхъугъу,
Нэплъэгъум къифэрэр тэубы,
Убэным тибэщыпэхэр ел1ыц1эх,
Шхъогъоным тыгухэр ец1алэх,
Мылъку зи1эмэ ч1ыфэ т1ахы, къытш1уашхы,
Мымэхъашэу, сабый хьакъым емыплъэу,
Ыпэ плъэхэу, еджап1эхэр амыш1эу,
Мыгъэ тш1эрэр к1ы мэзихым тфимыкъоу,
Мэкъумэщ пэмык1ырэ лэжьак1э тымыш1эу,
Зибэ тхэтыр хьилымым емык1оу,
Еджэныр тиджагъоу,
Непэрэ гъогумк1э тынэшъу;
Шъок1э ц1ыфыгъэр тэ1ыгъы,
Адыгэгъэ мак1э къытхэфэ,
Тиц1ыфыгъэ гоо-гуаом редзыхы,
Шыу едзыхыр къэбарк1э къытфа1о,
Къа1уатэрэр тыгъуак1ом ихъишъ,
Кушъэм хэлъыр бзаджэм фагъасэ,
Гъэсэныгъэм инэу щагъащтэ.
Л1ыжъэу тхэтымэ къэбарк1э тяупч1ымэ
Дунаим и1аягъэу, жъалым зэманыр къа1уатэ:
Тхьэр щы1эзэ, пщым фэпщыл1хэу,
Оркъ лыц1ыр ц1ыфыгъэк1э рагъэкъоу,
Мэкъумэщыш1эм ицуит1у къыш1уашхэу,
Пщым дашхэрэр хьак1э гъуак1омэ аратэу,
Былымэу атырэр тхьамык1эм тырахэу,
Хыеу ахэтым иунапчъэ 1уаутэу,
Забыт унашъо ямы1эу,
Пщым фэмыер чъыгым рапхымэ аук1эу,
Тхьамык1эр зэхэзыхырэр тыдэ къик1ын а1оу,
Хьамэщым гъушъырэр къытетщэу,
Ахъщалъэм дышъэ макъэ дэмы1ук1эу,
Къэралэу къытфыщык1ырэм мыхабзэр къыти1омэ
"Хъунэп" т1оу фэтымыдэу,
Тиц1ыфыгъэ тш1омык1одэу,
Тик1одыгъо къыттек1оу
Хъунэу тхэтыр тш1ок1одымэ
Адыгагъэр зытхэк1ык1э
К1эй ныбэмэ пцэжъые тащешэу,
Къаушэк1урэ лэучэц1ым тыфэдэу,
Тызыфэдэ ц1ыф лъэпкъ щымы1эу,
1офэу щы1эм т1э илъ хэмытэу
Тызыгот къэралымк1э тыпщыл1эу,
Л1ыгъэ зи1эр тимак1эу,
Тэщ нахьык1эр ц1ыф мыгъоу
Тыхъунк1э сенэгуе шъхае, еоой-еоой.
Хэгъэгумк1э сымыл1ынэу,
Къэлэмк1э сымыпащэу,
Щынагъо с1эк1эмылъэу
Сэпсалъэк1э сыд пк1э и1.
Сыд а1э илъ с1оу сыгу илъти,
Сикъэлэм гу зылъетэм,
Мэрчэпым зыхидзи,
Тхылъып1эм зыдидзыйи
Мы заулэм къарадзыгъэшъ,
Емык1у самыш1ынк1э
Ш1у зи1эмэ сялъэ1у.
Ш1эныгъэлэжьэу Гъыщ Нухьэ къызэри1орэмк1э, мы усэр Дыдык1 Курацэ къы1отэжьызэ, Дыдык1 Мирэ къытхыжьыгъагъ. Ежь Нухьэ усэр къуаджэу Джамбэчые 1987 илъэсым щитхыжьыгъагъ. Дыдык1 Курацэ зэри1ощтыгъэмк1э, ар Мирэ хегъэунэфык1ы, мы усэр зызэхалъхьагъэр я 19-рэ л1эш1эгъум ык1эхэм адэжь. Зы ц1ыф 1уш гумызагъэ горэм зэритхыгъэр гъуащэрэп. Ащ фэдэ стиль, ащ фэдэ 1офыгъомэ афэгъэхьыгъэ гупшысэхэр зыехэр Анцокъо Хьаджэбэчэу Нухьэ елъытэ.
|