«Связым имастер» зыфиIорэ цIэ лъапIэр зыхьырэ Еутых Руслъан къуаджэу Аскъэлае письмэ­зехьэу Iоф зыщишIэрэр мыгъэ илъэс 20 хъущт. А цIэ лъапIэр Руслъан тIогъогогъо къыфагъэ­шъошагъ. Апэрэр - Адыгэ РеспубликэмкIэ 2002-рэ илъэсым связым имэфэкI ехъулIэу ыкIи ятIонэрэр Урысые Федера­ци­емкIэ 2010-рэ илъэсым къы­раты­гъэх. Наградэ лъапIэхэм щытхъу тхылъхэри ахъщэ шIу­хьафтынхэри акIыгъугъэх. Зигугъу къэтшIыгъэхэм афэдэу Руслъан егъэлъапIэ тилъэпкъ гъэзетэу «Адыгэ макъэм» иредактор шъхьаIэ ыIапэ кIэдзагъэу «ШIуфэс письмэу» къыритыгъэу кIэтхэгъу уахътэу кIуагъэм дэ­гъоу зэрэхэлэжьагъэм фэгъэхьы­гъэр. Ежьым къыхегъэщы зэрэрайонэу ащ фэдэ къызэраты­гъэр ежьыр закъоу зэрэщымытыр.

Джыри зы щысэ. Ар зыфэгъэ­хьыгъэр Руслъан икъоджэ гу­псэ щыпсэурэ цIыфмэ лъытэныгъэу фашIырэр ары. АР-м ыкIи Пшызэ шъолъыр ащыпсэурэ быслъымэнхэм ямуфтиеу Емыж Нурбый-хьаджэр Аскъэлае мэщытым къызыщыкIогъэ джэмэхьат нэмаз лъапIэ горэм ыуж динлэжьмэ ягумэкIхэм ащыщэу зы раIотагъ. «Тикъуа­джэ къоджэ цIыкIоп, - ыIуагъ бзылъфыгъэ горэм, - унэгъо 430-м ехъу щэпсэу. Ефэнд Iо­фы­гъохэр зепхьанхэр зэрэмы­псын­кIэр хэти ешIэ. Тикъоджэ ефэндэу Хъот Бэчмызэ-хьаджэм гуа­дзэ ищыкIагъ. Тэ, динлэжьхэм­кIэ, тикъоджэ кIалэхэм тызахэдэм, Еутых Нурбый ыкъо Рус­лъан къахэтхыгъ. Ефэндыр къуа­джэм ынап. Руслъан кIэлэ ищыгъэ зэкIужь. Жэбзэ дахэ Iулъ. Илъэс пчъагъэ хъугъэу поч­тэм Iоф щешIэшъ, ищытхъу щэхъу къуаджэм щаIуагъэп. Ащ удэдгъэгущыIэ тшIоигъу». Емыж Нурбий-хьаджэм джэуап къаритыгъ: «УпчIэу непэ къэшъутыгъэм тIэкIу шIагъэ сызегупшысэщтыгъэр Еутых Руслъан сы­наIэ тесыдзагъэу. СыдэгущыIагъ ыкIи ау джэуапэу силъэIу Руслъан къыпигъохыгъэр ухэткIи зэкIэбгъэкIон плъэкIыщтэп. Янэ уз гъэтIылъыгъэ иI. Непэ тыдэ кIалэр щыIэми, янэ къызыфы­теокIэ ядэжь мэкIожьышъ, ифэ­Iо-фашIэхэр ешIэх, етIанэ ихэ­бзэ IофшIапIэ Iохьажьы. Аскъэ­лэе почтэ къутамэм ипэщагъэу Цыргъой Хъарыет пенсием кIуи почтэм зыIокIыжьым, ащ ычIыпIэ Руслъан зыкIафимыхьагъэри янэ зэрэсымаджэр ары». Нурбый-хьаджэр зытэгъэкIотэжь нэужым тэ, динлэжьхэмкIэ, мэщытым Руслъан тыщытегущы­Iэ­жьыгъ. Ны-тыхэр ислъам диным анахь ыгъэлъэпIэрэ пкъыгъомэ ащыщых, апэ дэдэ регъэшъых пIоми ухэукъонэп. «Аферым, Рус­лъан», - тэзэрэгъэIуагъэ.

Динлэжь нахьыжьыIохэми Руслъан ятэ фэгъэхьыгъэ гукъэ­кIыжь­хэр къаIотагъэх. Еутых Нурбый къоджэ ефэндкIэ зэрэфэягъэхэр, ау а IэнатIэр зэрафимыштэгъагъэр къыхагъэщыгъ. Аркъыр, кIэпыр, тутыныр, нэ­мыкI мыхъомышIэхэр Нурбый къызэрэхэмыфэщтыгъэхэр, ыкъо­хэми ятэ гъогу занкIэу зытырищагъэхэр зэрамыхъожьырэр, якъоджэгъухэмкIи, фэ­шъхьаф цIыфэу щыIэныгъэм икъогъупэхэм щызэутэкIы­хэрэмкIи щысэтехыпIэ зэрэхъухэрэр, ятэ фэдэхэу IэпкIэ-лъап­кIэхэу, IофышIэшхохэу зэрэщытхэр къаIотагъ.

Еутых ПIытIэм ыкъоу Нурбыйрэ Сарэрэ 1956-рэ илъэсым зэшъхьэгъусэ зэфэхъугъэх. Апэрэ сабыир - Мурадинэ, 1958-рэ илъэсым, ятIонэрэр - Теуцожь, 1962-рэ илъэсым, тIолъфэны­къохэу Аслъанрэ Руслъанрэ 1966-рэ илъэсым къэхъугъэх. Нурбый мэлахъоу Кировым ыцIэ­кIэ щыт колхозым Iоф щи­шIэщтыгъэ. ТIолъфэныкъуитIур къэхъуфэхэкIэ Сари ащ щылэжьагъ. ЕтIанэ унэгъо Iофхэм, кIэлэцIыкIу пIуным зафигъэзэжьыгъ. НахьыкIэхэр кушъэм хэпхагъэхэу, нахьыжъхэр ахэм алъыплъэхэзэ, яни ынаIэ къатетэу унэгъо хъызмэтхэр Сарэ зэшIуихыщтыгъэх. ЗэшиплIымэ ана­хьыкIэу унэгъуачIэм къина­гъэр Руслъан.

Аскъэлэе гурыт еджапIэр къы­зэреухэу Руслъан IофшIэ­ныр ригъэжьагъ. Сэнэхьат гъэнэфагъэ иIагъэпти, Iоф зэфэ­шъхьафхэр ыгъэцакIэщтыгъэх. Колхозым хащхи, итIолъфэны­къо Аслъани игъусэу дзэм аща­гъэх. Украинэм дзэ къулыкъур къызыщахьым, Гедыуаджэмэ япхъу зэунэкъощ пшъашъэхэр къащагъэх.

Унагъо ышIэнэу Руслъан зыригъэжьагъэр 1993-рэ илъэсыр ары. А лъэхъаным почтэм Iоф зыщишIэрэр илъэс Iэпэ-цыпэ хъу­гъагъэ. Ежьыррэ Заремэрэ апэрэ сабыир - Аскэр 1994-рэ илъэсым къафэхъугъ. Джы ар Кубанскэ университетым исоциальнэ-экономическэ факультет бухгалтер-экономист сэнэхьатыр щызэрегъэгъоты. Акъо нахьы­кIэу Рэмэзанэ Аскъэлэе гурыт еджапIэм ия 7-рэ класс къеухы. Ари дэгъоу еджэ, янэ-ятэхэми адэ­IэпыIэ. Ахэм Iэдэб зэрахэ­лъым фэдэу уилъфыгъэхэр бгъэсэнхэм, бгъэдэIошъунхэм апае уихэбзэ ыкIи уиунэгъо Iоф­хэр дэгъоу бгъэцакIэхэу, уикIэ­лэпIун хъызмэтхэр сыд фэдэрэ Iофы­гъохэми апэ ибгъэшъыхэу, уянэ-уятэмэ гъэсэпэтхыдэу акIэ­лъы­рыпхыгъэхэр бгъэфедэхэу, уикIа­лэхэми ахэм яныбджэгъухэми щысэтехыпIэ уафэхъоу ущытын фае.

Сыд фэдэрэ Iофи Руслъан гухахъо хегъуатэ. «СиIофшIэн ­игъом дэгъоу зызгъэцакIэкIэ, 
рэхьат сэхъу», - еIо. Унэгъуи 142-рэу связь IофыгъомкIэ Руслъан епхыгъэхэр тхьамэфэ кIо­цIым ежэх.

ТичIыгу зыIыгъыр Еутых Рус­лъан фэдэ кIэлэ шIагъохэр арых. ЛэжьапкIэр макIэми, гу­кIэгъур къебэкIы, щыIэныгъэм ишIухьафтын нэф-нэбзый кIэ­кIы­мэ акIэгушIукIы. Бэм лъыIа­бэрэп, иIэм езэгъы, зэрегъэфэшъу.

Упсаоу, унасыпышIоу гъэ мин огъашI, Руслъан!

Емыж Муслъимэт.

http://www.adygvoice.ru/newsview.php?uid=6480