Къуаджэу Аскъэлае дэт фельдшер-мамыку IэзапIэм ипа­щэу Бэгъушъэ Асыет лъэгъун дысиIэу мафэ горэм иIофшIапIэ сыкIуагъ. Коридор нэфынэ къа­бзэм пхъэнтIэкIу кIыхьэу ­дэтым чэзыум ежэрэ бзылъфыгъэ зау­лэ тес. Сэлам зызэтэхым ыуж ахэр зэлъыкIуатэхи, сытIысынэу чIыпIэ къысфаунэкIыгъ. «Хьау, тхьашъуегъэпсэу, сэ Асыет лъэ­гъун дысиI», - сIуагъэ. «Ар джы­дэдэм процедурнэм щыI, сы­маджэхэм капельницэхэр ахе­гъэ­уцох. Тэри ары тызажэрэр», - къысаIожьыгъ бзылъфыгъэ­хэм. Капельницэхэр тикъоджэ Iэ­запIэ щафыхагъэуцохэу къы­зэраIорэр згъэшIэгъуагъэ, сыда пIомэ ащ IэпэIэсэныгъэ зэри­щы­кIагъэм нэмыкIэу, пшъэдэ­кIы­жьышхуи пылъ. «ЩыIэныгъэм укъыщенэ, Муслъимэт. Илъэс пчъагъэ хъугъэ тиамбулаторие имызакъоу, сымэджэ онтэгъу­хэм яунэхэм защыфыхагъэуцохэрэр», - аIо сигущыIэгъухэм.

- Асыет фэдэу шэн гъэ­тIы­лъыгъэ дахэ иIэу, ыкIуачIэ шъхьа­мысэу сымаджэхэм адэлажьэу, коллективэу ­зипащэри Iэдэб хэлъэу зэрищэу фельд­шер гъотыгъуае , - еIо Емыж Саныет.

- Ары мыхъугъэемэ, джыдэдэм мы чIыпIэм сыщысы­щты­гъэп, - къыхегъэхъожьы Шэу­джэн Хъарыет. - ГъэрекIопагъэ чэщ горэм лъыдэкIуаем дэи сишIи, Асыет къысфащагъ. Iэ­зэгъу уцхэр къысишIэфыхэу чэщ реным къыспэсыгъ. НахьышIуIо сызэхъужьыми «къыорыкIощтыр сымышIэу сырэхьатыщтэп», - ыIуи, тфэкIожьыгъэп.

- Чэщ Iофыр Асыетэп ныIа зезыхьанэу щытыр, Пэнэжьы­къуае дэт «IэпыIэгъу псынкIэр» ары нахь, - еIо Саныет.

- ЦIыфхэр гузэжъуапIэ зи­фэхэкIэ, нахьыбэрэм зыдэжь кIохэрэр Асыет ары, - бзы­лъфыгъэхэм ащыщ горэм къахелъхьэ.

Бэгъушъэ Асыет ищыIэныгъэ гъогу мыпсынкIэ сэ ­сыщыгъуаз. Мыекъуапэ дэт медицинэ учили­щым ифельдшерскэ отделение къыухыгъэу къутырэу Краснэм (Теуцожь район) Iоф щишIэнэу Барцо Хьалимэ ыпхъу Асыет 1968-рэ илъэсым агъэкIуагъ. А илъэс дэдэм Аскъэлае дэт фельд­шер-мамыку IэзапIэм пащэ фашIыгъ. Джащ къыщегъэжьагъэу Асыет иIофшIэн щытхъу хэлъэу егъэцакIэ.

Медицинэр Асыет икIас, ишIэ­ныгъэхэм ахигъэхъоным дэ­шъхьахырэп, иIофшIэнкIэ анахь ынаIэ зытыригъэтырэр псауны­гъэр къэухъумэгъэным епхыгъэ пэшIорыгъэшъ Iофтхьабзэхэр цIыф­хэм адызехьэгъэныр ары. Ар Iэшъхьэтет IэпэIас, ­зипэщэ IэзапIэм зэгурыIоныгъэ чIэлъ, иIофшIэгъухэр Iэдэб хэлъэу зэ­рещэх, захиIэтыкIырэп, ищы­кIагъэмэ, упчIэжьэгъу ешIых, ящытхъу еIуатэ. Асыет гущыIэ­рыеп, ау ипсалъэ мэхьэнэ гъэнэфагъэ хэлъ, гушIубзыу, сэмэр­къэуми зыщидзыерэп. ИIофшIэн фыщытыкIэу фыриIэм хабзэми уасэ къыфишIыгъ. Теуцожь рай­он администрацием ищытхъу тхылъхэр илъэс ­зэфэшъхьафхэм къыфагъэшъошагъэх 1983-рэ илъэ­сым цIэ лъапIэу «Урысыем псауныгъэр къэухъумэгъэнымкIэ иотличник» зыфиIорэр къыратыгъ, IофшIэным иветеран, Теу­цожь районым ицIыф гъэшIуагъ.

Мыпшъыжьэу Бэгъушъэ Асыет ипшъэрылъхэр непэ зэрэзэ­рихьэхэрэм фэдэу тапэкIи зэри­хьэшъухэу, псауныгъэ иIэу, шIу­шIакIоу илъэсыбэрэ къытхэ­ты­нэу, исабый унагъо гу ­щифэнэу Тхьэм тыфелъэIу.

Емыж Муслъимэт.

                                                                                                                          Аскъэлай.

http://www.adygvoice.ru/newsview.php?uid=14542