Гъэтхапэм и 29-м Мыекъопэ къэралыгъо техно­логическэ университетым ишIэныгъэ тхылъ­еджа­пIэ мэфэкI дахэ щыIагъ. Ащ усакIоу, зэдзэкIакIоу, ­тележурналистэу, режиссерэу Емыж МулиIэт хэлэжьагъ, еджэпIэшхом истудентхэм аIукIагъ.

МэфэкI зэхахьэр кином и Илъэс ыкIи ежь Емыж МулиIэт къызыхъугъэ мафэм (мэлылъфэгъум и 4-м) афэгъэ­хьыгъагъ.

Университетым ибиблиотекарь шъхьаIэу Ирина Константиновам тызэригъэгъозагъэмкIэ, апшъэрэ еджапIэм сэнэхьат зэфэшъхьафхэр щызэзгъэгъотыхэрэм шIэныгъэ-къу­лайхэм ямызакъоу, хэгъэгу ыкIи лъэпкъ культурэр ашIэныр ищыкIагъ.

— Илъэсыр кином фэгъэхьы­гъэщт, ар къыдэтлъыти мы Iо­фым тыкъекIолIагъ, — еIо бзы­лъфыгъэм. — Ащи иза­къоп, мэлылъфэгъум и 4-м, 2016-рэ илъэсым зэлъашIэрэ поэтессэу, зэчый куу гъэшIэ­гъон лъэ­ныкъуабэкIэ зыхэлъ Емыж Му­лиIэт къызыхъугъэ ма­фэм те­фэу итворчествэ, ипоэзие, ифильмхэм ныбжьы­кIэхэр афэ­гъэнэIосэгъэнхэр игъоу тлъэ­гъугъэ. Ежь студент­хэри ашъхьэкIэ Iофтхьабзэм къыхэдгъэлажьэхэмэ тшIоигъоу, иусэхэм зафагъэнэIосэнэу ыкIи хэти ыгу рихьы­гъэм зэIукIэгъум къыщеджэнэу ятIо­гъагъ. ЗэкIэ мыдэеу зэпыуцо­нэу къысщэхъу.

Творческэ зэIукIэгъур И. Б. Константиновам ащ пыдзагъэу шIуфэс гущыIэкIэ къызэIуихыгъ. Залым зибэ чIэс ныб­жьыкIэхэр кIэкIэу МулиIэт ищы­Iэныгъэ ыкIи итворчествэ ащ фигъэнэIосагъэх.

Мэлылъфэгъум и 4-м, гъэтхэ охътэ дахэм, Теуцожь районым ит къуаджэу Аскъэлае МулиIэт къызэрэщыхъугъэр, къешIэкIыгъэ дунаир гукIэ пэ­благъэу, къуаджэр зыкIэрыс псыхъоу Мартэ иIушъэшъэ чъа­кIэ кIэдэIукIыныр икIасэу, IупкIэу, шIыкIашIоу къызэрэтэ­джыгъэр, усэным еджапIэм чIэсзэ зэрэфежьагъэр, ытхыхэрэр район ыкIи хэку гъэзе­тэу «Социалистическэ Адыгеим» къызэрарыхьэщтыгъэхэр къыIуагъ. ИкIэсэ литературэм нахь пэблагъэ зишIымэ шIоигъоу Москва дэт ­Литературнэ институтэу М. Горькэм ыцIэкIэ щытым зэрэщеджагъэр, къызэриухыгъэр, лъэныкъуабэкIэ гъэзэгъэ зэчый зэриIэм студентхэм анаIэ тыраригъэдзагъ.

Апшъэрэ еджапIэм щеджэхэрэм ащыщхэу литературэр, анахьэу поэзиер, зикIасэхэр МулиIэт иусэхэм ябгъукIуагъэ­хэп, ахэм яджагъэх ыкIи агукIэ анахь аштэгъэхэ лирическэ усэ зэфэшъхьафхэм къя­джагъэх — Кристина Маилян, Молдовэм щыщ пшъашъэу Татьяна Симаковар, Iэ­кIыб къэрал, Непал щыщэу, Iэ­зэн факультетым щеджэу Дахал ­Приянка, мы факультет дэдэм истуденткэу, Турк­мением къикIыгъэу Гульмира Пенджиевар.

Емыж МулиIэт лъэныкъуа­бэкIэ гъэзэгъэ зэчый зэрэхэ­лъым — зэрэзэдзэкIакIом, фильм­хэр зэрэтырихыхэрэм, ­тележурналистикэм фэгъэхьы­гъэмэ, тарихъ хъугъэ-шIэгъэ инхэр къизыIотыкIырэ къэтынхэр зэригъэхьазырхэрэм, зэрэ­гупшысэкIо IофшIэкIошхом ягу­гъу къышIыгъ Ирина Константиновам.

Емыж МулиIэт поэтическэ тхылъ пчъагъэ адыгабзэкIэ ыкIи урысыбзэкIэ къызэрэдигъэ­кIы­гъэр, ипьесэхэр ыкIи нэмыкI драматургхэм — А. С. Пушки­ным, IэкIыб къэралхэм ащыщхэм япроизведениехэу зэри­дзэ­кIы­гъэхэр Адыгэ къэралыгъо драмтеатрэм исценэ зэрэщагъэ­уцугъэхэр къыIуагъ. Ежь ыгъэ­уцугъэ фильмхэу «Навеки с Россией» ыкIи «Черкессие султаны Египта» зыфиIохэрэр, Емыж МулиIэт иIофшIагъэхэр документальнэ лъапсэ зиIэхэу, адыгэ-черкес мамлюкхэу Мысырым ыкIи Сирием арысхэм ашъхьэ къырыкIуагъэр упкIэп­кIыгъэу уанэIу къизгъэуцохэу ылъытагъ.

Студентхэр МулиIэт ыгъэуцугъэ фильмэу «Мысырым иадыгэ султIанхэр» зыфиIорэм рагъэплъыгъэх. Тарихъ лъэпсэ­шхо зиIэ фильмэр ныб­жьы­кIэ­хэм ашIогъэшIэгъоныгъ, ащ ыужым ахэм упчIэ зэфэ­шъхьаф­хэмкIэ — сыдэущтэу мыщ фэдэ темэр къыхихынэу хъугъа, фильмэр зэрэтырихыгъэ шIыкIэр, чIыпIэу зыщытырихыгъэр, IэпыIэгъу анахь къыфэхъугъэр игухэлъ зэшIуихы­нымкIэ, рольхэр хэтха къэзы­шIыхэрэр, ахэм анэмыкIхэмкIи зыкъыфагъэзагъ.

Емыж МулиIэт игуапэу ахэм джэуапхэр аритыжьыгъэх. Творческэ зэIукIэгъум ышъхьэкIэ зэригъэрэзагъэр, сыдигъуи на­хьыжъхэмрэ нахьыкIэхэмрэ азыфагу зэпхыныгъэ зэрилъы­гъэр ыкIи зэрилъыр игуапэу къыхигъэщыгъ. Неущрэ мафэм щыпсэущт ныбжьыкIэхэм хэти акъылкIэ, шIэныгъэкIэ, амалкIэ, IэпэIэсэныгъэкIэ адэгуащэмэ, кIэлакIэхэр гъогу занкIэ зэрэ­ры­кIощтхэр, ашъхьэкIэ дахэу зыкъызэрагъотыщтыр ипсалъэ къыхэщыгъ.

Мамырыкъо Нуриет.

Сурэтхэр мэфэкIым Iэшъынэ Аслъан къыщытырихыгъэх.

http://www.adygvoice.ru/